ජේසුස් වහන්සේගේ අවසන් වාක්‍ය සත 6

‘‘සියල්ල නිම වීය" - ජොහාන් 19 : 30

‘‘ජේසුස් වහන්සේ විනාකිරි පිරිගත් පසු, ‘සියල්ල නිම වීය' යි වදාරා හිස නමා ස්වකීය ප්‍රාණය භාර දුන් සේක." (ජොහාන් 19 : 30) යනුවෙන් ජොහාන් සුවිශේෂකවරයා  පමණක් මෙම සුභාරංචි වාක්‍ය සඳහන් කරයි. 

දෙවියන් වහන්සේ හා සමානත්වය දැරූ ජේසුස් වහන්සේ (ජොහාන් 1 : 1 - 2) දේවත්වය අත්හැර මිනිස්බව ගෙන අප අතරට ආවේ (පිලිප්පි 2 : 6 - 7), දෙවියන් වහන්සේ ගෙන් තමන් වහන්සේට පැවරුන මෙසියානු කාර්යය ඉටු කිරීම සඳහා ය. එම කාර්යය නම්,

• දේවත්වය අත්හැර මිනිසත්බව ගැනීම
• ඉශ්රායෙල් සමාජය තුළ මිනිසෙකු ලෙසින් ජීවත් වෙමින් සුභාරංචිය ප්‍රකාශ කිරීම
• පව්කාරයන් මනස්ස්ථාපනයට කැඳවීම හා දෙවියන් වහන්සේ කෙරෙහි සැබෑ ඇදහිල්ල ඇති කිරීම තුළින් දේව රාජ්‍යය ගොඩනැගීම
• දේව කැමැත්තට සම්පූර්ණයෙන් අවනත වෙමින් ගැළවීමේ දේව සැලැස්ම පරිපූර්ණත්වයට පත් කිරීම
• ගැළවීම, දේව සම්බන්ධතාවය ගොඩනැගීම හා සදාතන ජීවනය අත්කර දීමට සිය ජීවිතය පූජා කිරීම    

යනාදිය ය. අවුරුදු 3 ක පමණ කෙටි කාලයක් තුළ බොහෝ වෙහෙස වී එතුමන් එම කාර්යය නිම කළ සේක. “ඔබ වහන්සේ මට භාර දුන් මෙහෙය සම්පූර්ණ කරමින් මම මිහිපිට ඔබ මහිමයට පැමිණවීමි" (ජොහාන් 17 : 4) යනුවෙන් ජේසුස් වහන්සේ තම උත්තම පූජක යාච්ඤාවේ දී කී සේක. මෙහි අර්ථය නම් ජේසුස් වහන්සේට දෙවියන් වහන්සේ පැවරූ වගකීම් කොටස ඉටු කර අවසන් බව ය. “දෙවියන් වහන්සේගේ වරප්‍රසාදයෙන් ක්‍රිස්තුස් ජේසුස් වහන්සේ අත්කර දුන් ගැළවීම කරණකොටගෙන, සියල්ලෝම නොමිළයේ දේව සම්බන්ධතාවයට පත් කරනු ලැබ සිටිති," (රෝම 3 : 24) යනුවෙන් පාවුළුතුමා ප්‍රකාශ කරන්නේ එබැවිනි.

“සියල්ල නිමවීය" යනුවෙන් ජේසුස් වහන්සේ ප්‍රකාශ කළ වාක්‍යයට වෙනත් භාෂා වලින් නොයෙක් අර්ථ දීමට පුළුවන. මෙම ප්‍රකාශනය සඳහා ජොහාන් තුමා භාවිත කර තිබෙන ග්‍රීක් වචනය “ටෙටෙලෙස්ටා" [Tetelesta] යන වචනය ය. මෙහි තේරුම තමන්ට භාර වූ කාර්යය සාර්ථක ලෙස නිම කළ ජයග්‍රාකයෙකුගේ හඬ යන්න ය. ජේසුස් වහන්සේ මරණය පිළිගත්තේ නිදහස් කැමැත්තෙන් හා සතුටිනි. මනුෂ්‍ය මට්ටමින් මරණය වේදනාත්මක අත්දැකීමක් වුවත්, තම මෙසියානු කාර්යය සම්පූර්ණත්වයට පත් කිරීම හා තම වගකීම් සපුරා ඉටු කිරීම තුළ ජේසුස් වහන්සේ තෘප්තියට පත් වූ සේක. එතුමන් මරණයට සූදානමින් සිටි සේක. තම මරණය ගැන තම ශ්‍රාවකයන්ට තුන්වරක් ම සිහි ගැන්වූ සේක. (ලූක් 9 : 21 - 22, 43 - 45, 18 : 31 - 34) එසේම තම මරණයට මුහුණ දීමට එතුමන් ආශාවෙන් ද සිටි බව පෙනේ. “මට එක්තරා බව්තීස්ම-ස්නාපනයක් ලබන්න තිබේ; එය ඉටු වනතුරු මම දැඩි සිත් වේදනාවෙන් පසුවෙමි" යි (ලූක් 12 : 50) යනුවෙන් ප්‍රකාශ කළේ එබැවිනි. මෙම බව්තීස්මය වනාහී තම ශ්‍රී රුධිරයෙන් කරන බව්තීස්මයකි. එනම්, ඔවුන් වහන්සේගේ මරණය ය. මරණයට නිදහස් කැමැත්තෙන් හා සතුටින් මුහුණ දීම තුළ දෙවියන් වහන්සේගේ මිනිසා ගැළවීමේ කාර්යය සමුපූර්ණත්වයට පත්වන බැවින්, “සියල්ල නිමවීය" යි ජේසුස් වහන්සේ වදාළ සේක. 

කිතුනු අපට ලැබෙන පණිවුඩය

“සියල්ල නිමවීය" යන වාක්‍යය තුළ ජේසුස් වහන්සේගේ ජීවිතය හා ක්‍රියාවන් සියල්ල මරණයෙන් අවසන් යැයි කෙනෙකුට සිතෙන්නට පුළුවන. එහෙත් ඔවුන් වහන්සේගේ ජීවිතය “සියල්ල නිමවීය" යනුවෙන් අවසන් කිරීමට හැකියාවක් නැහැ. ඇතැම් පුද්ගලයන් ජීවිත කාලය තුළ කරන යහපත් ක්‍රියාවන් නිසා ඔවුන්ගේ මරණයෙන් පසුවත් ඔවුන්ගේ නාමය අන් අය අතර පවතිනවා. මිනිසුන්ගේ හදවත් තුළ සදාකල් ජීවත් වෙනවා. ජේසුස් වහන්සේ ද එවැනි පුද්ගලයෙකි. ඔවුන් වහන්සේ මිනිසුන් අතර ජීවත් වූයේ අන් අයගේ දුක හඳුනන, අන් අයගේ සැබෑ මිතුරෙක් වගේ. ජේසුස් වහන්සේ අන් අයගේ ජීවිත වලට අභියෝගයක් දුන්න. අයහපතට යොමු වූවන්ට යහ මග පෙන්වා දුන්න. 

කිතුනුවන් වශයෙන් අපව ජේසුස් වහන්සේ කැඳවන්නේ දැහැමි ආදර්ශමත් ජීවිතයක් ගත කරන අතර, අන් අයගේ ජීවිත යහපතට යොමු කරවීමට ය. ඇදහිල්ලේ කිතුනු ජීවිතයක් ගත කරමින් ක්‍රිස්තුස් වහන්සේට සාක්ෂි දැරීමට ප්‍රසාද ස්නාපනයෙන් දෙවියන් වහන්සේ අපට දිව්‍යමය දිවැසිවර කැඳවීමක් දී තිබේ. අපගේ මරණ මොහොත දක්වා ම එය ඉටු කිරීමට අප බැඳී සිටිමු.